Vacairón na Pobra do Brollón

Trasantonte Vacairón,
coa "profe" Luisa marchou.
Paseouna por todo Eixón,
que está na Pobra do Brollón.

Viu igrexas e letreiros,
muíños e castiñeiros;
mais non se puido resistir...
e ao sinal colocoulle o til.

Moi ben feito, Vacairón:
ao incorrecto, dille "NON"!

Vacairón en Vilamor

Onte Vacairón escolleu os pastos dun lugar cun topónimo ben fermoso; e aproveitando tal circunstancia, propoñémosvos unha nova investigación con premio para quen responda correctamente e en primeiro lugar: 

CAL É O NOME COMPLETO DA PARROQUIA Á QUE PERTENCE VILAMOR? 

[Queda excluído expresamente do concurso o autor da fotografía e parroquiano do lugar, Iker].

Animádevos a consultar o nomenclátor. Yolanda (4º ESO) xa recibiu o seu agasalliño tras dar coa resposta certa á anterior pregunta proposta desde PuntoGalego.

Vacairón en Pantón

Antonte Vacairón marchou de paseo con Ángela para coñecer algúns lugares da contorna. Como unha turista máis, deixou constancia do seu paso polas aldeas e parroquias fotografándose xunta os letreiros. 

Podes consultar o nomenclátor da Xunta de Galicia AQUÍ, para localizar o erro ortográfico que se agocha nun dos sinais. Mándanos a túa resposta como comentario e talvez recibas un premio de PuntoGalego.

15-M: O reto

Chegou o momento de demostrar o que vales. 

Apoia o teu equipo falando galego todo o día!

A Az

Noemi (4º ESO) envíanos esta fotografía do letreiro do lugar da Az, situado na parroquia de Ousende (O Saviñao). 

Neste caso, os autores do sinal indicador optaron por reproduciren a forma máis próxima á oralidade, que tende a inserir un fonema epentético entre dúas vogais idénticas para facilitar a pronuncia. É o mesmo fenómeno que encontramos en exemplos como "a ialma, a iauga..." No caso deste topónimo, mesmo chega a perderse a noción de estar composto de artigo máis nome e intégrase o primeiro no segundo, como se fose unha soa palabra.

Podes consultar a páxina de referencia do nomenclátor AQUÍ.

Eu, pola toponimia, MA-TO!

Gabriel (4º ESO) documenta graficamente a falta do artigo nos sinais en dous topónimos da parroquia de Mourelos (O Saviñao), logo de comprobar a forma oficial dos nomes de lugar no nomenclátor da Xunta de Galicia.

Para coñeceres o significado dos vocábulos "mato" e "castro" no DRAG, preme sobre eles.

Urbanooooooooo!!!

Moncho e Mateo (Primaria e Infantil)

Escoita os pícaros; case sempre saben o que din

Ligazón: "Urbano-ana" no DRAG

Aaahh!!!

Gabriel (4º ESO)

Talvez por culpa dos recortes, algúns lugares de San Xulián de Mourelos perderon o artigo. 

Podes consultar aquí o nomenclátor para coñeceres o nome de todas as aldeas desta parroquia do Saviñao.

"Mens sana in corpore sano" (e viceversa)

Iker (4ºESO)

"Pavillón" no DRAG

Demasiado relax

Iria, Natalia, Ángela e Paula (3ºESO)

Relaxarse está moi ben, pero tampouco hai que pasarse e prescindir do dicionario

Enlace ao vocábulo "ioga" no DRAG

Ti tamén tes un punto galego

PuntoGalego informa de que Julio Iglesias non cobrou un peso por esta publicidade

Maldito "de O"!

Fátima non sorrí porque lle guste este erro (xa comentado nunha entrada anterior), senón porque está sufrindo un proceso acelerado de inflamación que lle incha as fazulas. Non vedes como lle quedou a man? 

[Do verbo latino INFLAMMARE proveñen o cultismo "inflamar" e a palabra patrimonial "inchar".]

O Noso Lar

Como Iker explica perfectamente no seu correo, o apóstrofo resérvase unicamente para representar na escrita certas ligazóns fónicas (Ven pr'onda min) ou para unir algunhas preposicións cos títulos de obras artísticas (O Milhomes é un personaxe d'A esmorga).

Cuestións lingüísticas á parte, desde PuntoGalego recomendamos o delicioso café que preparan neste establecemento (unha cousa non quita a outra), no caso de serdes maiores de idade sen problemas de hipertensión.

Praza Maior

Podes consultar AQUÍ a entrada do vocábulo "maior" no DRAG para coñecer as súas acepcións, sinónimos, usos, expresións e frases feitas, pronuncia, etc.

Todo o mundo pode ter o seu punto... galego

Por se aínda hai quen pense que co galego non se vai moi lonxe... ZAS! En todo o fociño!

Leite galego

Lembra:

A forma normativa para o demostrativo neutro é ISTO.

A afirmación SI non leva til, porque non hai que distinguir esta palabra de ningunha outra (a partícula condicional é "se"). 

O adverbio de cantidade MÁIS, no entanto, debe levar o acento gráfico (diacrítico) para distinguilo da conxunción MAIS.

E nunca, nunca, nunca te esquezas de que a 3ª persoa do verbo "ser" leva un til coma un mundo: É!

Grazas a ti

Grazas a ti, Julia, por recordarnos que os adultos tamén nos equivocamos (e tampouco se acaba o mundo). A única condición sine qua non para aprender algo é non sabelo previamente.

O tríptico de Julia

Non pensedes que Julia ten unha tarxeta "black" de Abanca... É simplemente que recoñece as cousas ben feitas.

Pabellón? Mercadero ganadeiro??

A Janena dálle a risa, e non é para menos: en galego, as formas correctas son "pavillón" e "gandeiro". O de "mercadero" xa a deixou sen fala...

De O Saviñao?!

Pablo está que bota chispas, e non me estraña. Como conseguiremos que o alumnado non cometa erros ortográficos, se ata os rótulos dun concello ou dun centro escolar están mal escritos?

A forma correcta, como prescriben as Normas ortográficas e morfolóxicas da lingua galega na páxina 86, sería: Concello do Saviñao. Aplicando a mesma norma, escribiremos "da Coruña", "na Guarda" ou "polo Rosal".

En canto ao til, recordemos unha vez máis que o uso das maiúsculas non exime da obriga de colocalo cando lle corresponda. (Que difícil é acabar coas lendas urbanas, meu Deus!).

[No enlace subliñado arriba, podes descargar de balde o pdf publicado pola RAG.]